齊哇哇釣魚會

一年一度的通宵釣墨魚夜

期待已久的活動終於來臨啦,今年一如以往一樣玩得相當開心,但好可惜今年的人數都係唔可以超過十二位,因為近兩三年西貢的水警對漁船的人數檢查得好嚴謹,而我哋亦唔想連累船家被水警抄牌罰款,所以有幾位好朋友都冇份出席去玩,而今年更加是過去咁多年令到我最興奮的一年添,係乜野令到我咁興奮?
咁大家就要睇下內文喇 … 060721000

星期六晨早一起由香港仔坐亡命小巴去旺角,入到西貢當然急不及待走去食番個靚靚早餐啦,先來個魚蛋豬皮豬紅蘿白車仔麵,醫好個肚就當然要去超級市場買野啦,今日我哋打算會係西貢對出的橋咀島的燈塔位釣魚同燒野食,買齊晒所有野之後就去碼頭上船喇。

跟住當然係坐快艇去橋咀島啦,點知我哋的先頭部隊第一班人居然上錯位,攪到成班人要係烈日當空下步行成半個鐘行去燈塔度,當日天氣十分炎熱,三十幾度高溫,見到個太陽伯伯仲笑得非常之燦爛!行到一半路程我個身已經好以被水淋濕晒咁,總之就由頭濕到落腳啦,幾經辛苦終於行到燈塔位呀。

去到燈塔位各人已急不及待,攞出釣魚裝備出來開始釣魚,我當然亦是一樣啦,立即攞出我的幸運魚竿搵番個靚位釣魚喇,不到一會就已經有人有魚上釣,雖然只是幾條細魚「三蘇」、「哨牙妹」、「石九公」之類啲魚,但大家亦釣得相當開心。這時我手上的魚竿立即有震動,於是我手起一抽竿,已知這條魚應該是有番咁上下大條,攪了兩手魚絲,突然傳來「啪」一聲!噢,斷絲收場添!不過唔緊要,仲有大把時間可以報仇。於是我再次綁好釣組再次拋番落果個排位再釣過。又來啦!嘩,又係同一力度,這次同條魚玩咗分幾鐘,上水面啦!勁呀!原來係一條「紅蕃」亦有人叫它做「白兔仔」或「三刀立」又或者「紅雞」,都差唔多有成斤重,當時簡直開心到傻咗,企喺度狂笑。解好條魚之後當然唔好俾佢停啦,繼續再釣過,哈哈哈!我又中魚喇,今次係條「火點」都有手掌咁大架,之後仲釣到有「三蘇」、「石九公」之類啲魚,當心情稍為平靜下來之際,突然手上的魚竿竿頭一彎,又來呀!這次的力度仲大過之前果條,這次同樣地跟條魚玩咗五六分鐘左右,終於俾我攪掂上水啦,原來又係之前的「紅蕃」,呢條仲大條添,足足有成30cm長,真估唔到今日咁好運氣,因為好耐都未試過半個鐘內,連起兩條「紅蕃」同幾條「火點」。但我的同伴就冇咁好彩囉,佢哋係咁鈎石同打龜,而且仲釣埋啲魚毛仔,之後仲俾佢哋笑我話我可能因為除晒衫,突出個大肚腩先至會有咁多魚上釣,哈哈哈!如果係咁我咪次次去釣魚都要唔著衫突出個大肚腩。不過釣魚其實都係講三分技術七分運氣嘅,而且仲要撞啱流水添,因為之後果個幾鐘頭都靜晒,完全無魚上釣。

Ps:「以下某些圖片因為有露點成分所打了格仔」

 

真係快樂不知時間過,話咁快時間到了下午二點幾,係時候開爐燒野食啦,雖然當日天氣真係好熱,成三十幾度高溫。但燒野食呢個節目係一定會做嘅,因為我哋無論打風落雨又或者烈日當空,都唔理咁多照開爐燒野食。

當大家興高采烈燒野食之際,突然發覺「聰聰」同「依唷仔」走埋一邊唔知攪什麼鬼,於是好奇心走埋去睇下咩事啦,哎呀!原來「聰聰」佢被魚鈎鈎到呀,而且仲係鈎到手背仲鈎得好深添,佢真係好鎮定一啲都唔覺得佢有驚同痛的感覺,佢仲要將個魚鈎頭鈎穿自己的手皮,之後再用鉗鉗斷魚鈎尾部份,之後攞個魚鈎佢出來,但係佢攞個魚鈎出黎之後,啲血就好似爆水喉咁猛咁流出來,真係好似置身於現場睇史泰龍攞粒子彈出來場戲一樣,睇到都真係驚到震。
燒完野食之後,大家都熱到叫晒救命!於是乎就齊齊落海游吓水,佢哋仲潛水拾海膽同螺添,連「聰聰」包紮住隻手都忍唔住要落海游水,睇到佢哋游得咁開心真係有啲衝動跳埋落去涼番一陣

終於到咗晚上最重要的節目開始喇,當然係釣魷魚啦,當晚天色相當之好,風平浪靜,但又有少少涼風吹埋黎,是咁多年來最好的一晚,不過可惜水面上太多「青鱗仔」的魚仔游來游去啦,啲魷魚只係追啲「青鱗仔」食都唔游埋個魷魚鈎度,攪到我哋見到啲魷魚都釣唔到,不過世事冇絕對嘅,幾經辛苦我哋斷斷續續都釣到有兩三斤魷魚架。
咁新鮮嘅魷魚當然更係要即刻煮黎食啦,更加唔少得嘅就係我的魚獲啦,清蒸海上鮮,嘩…蒸埋都有兩大碟喎,仲煮埋佢哋今日潛水拾啲螺添。

唔…Yummy Yummy 太美味喇。

0 comments on “一年一度的通宵釣墨魚夜

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: