齊哇哇釣魚會

快樂的一天

八月六日 (星期日)
溫度 26-29 C
相對濕度 80-95 %
大致天晴、多雲
局部地區有零散驟雨
吹南至東南風三至四級

上星期颱風「派比安」掠過本港,更高掛三號風球長達三十六小時以上,更為本港帶來狂風暴雨,而很多人仕都認為,打風過後去釣魚收獲會好好多,雖然這番話一直都未有釣魚人仕去證實過,但我亦有些少同意以上講法,因打風過後,氣溫唔會太高,多雲會擋著大部份陽光,而吹南至東南風是最清涼的,所以這天氣其實好適宜出海釣魚。

亦因為這個原因,我約埋「依唷仔」、「爆竿王」、「亞平」和我弟弟「華少」再一次出海釣魚,而今次我哋的釣點是柴灣以東,藍灣半島對出海面船釣。

當日天氣正如天氣報告一樣,氣溫二十幾度,多雲吹和緩東南風,正合我意。坐咗十幾二十分鐘船程,終於去到藍灣半島對出海面的釣位喇,各人亦開始攞釣具放絲釣魚,釣了幾個字都冇乜起色,都是一些「石九公」、「梳羅」、「狗棍魚」,就在這時艇家的行家在對講機說有「紅魚」釣到,而且仲幾大條,於是乎艇家叫我哋收絲,駛去釣到「紅魚」的行家處度釣,大家當然舉腳贊成啦。

艇家駛到排位之後,各人都急不及待再放下魚絲釣魚,釣咗一陣,我的手上魚絲有動靜喇,我感覺到有魚含著我的生蝦,拉扯咗兩吓,我亦靜心等待它進一步食餌,因為有時啲魚唔會即時食魚餌入口架,佢會含著你的魚餌一陣,又或者拉扯你的魚餌。就在這時它大咬一口,於是乎我手起一扯!中魚!更覺得這條魚最少冇一斤都有十四五兩,我當然要就住手來起絲啦,因為我手上的魚絲只是六磅絲,唔可以同條魚鬥力,萬一斷絲就前功盡費。上水面啦!見到啦!哈哈!喺條「紅魚」呀,「依唷仔」這時更攞定撈箕將條「紅魚」撈起,咁開心釣到魚當然要影張相啦,正當我影相之際,坐在船頭替影相我的「華少」連自己新買的數碼相機都唔理,一手放低係腳邊,之後轉身扯番起自己的魚絲!這時「華少」神色緊張地起絲!我亦放低條魚唔解鈎住上前睇睇,只見「華少」不停地放兩三手絲扯回一手絲,睇來這條仲大條,我亦攞定撈箕等它起水,嘩… 見到啦!又係一條「紅魚」,而且仲大過我果條,攞上手已知有斤幾兩斤重,不單只重仲要係海「紅魚」添。

Ps:我稔您哋會問海「紅魚」同我釣果條「紅魚」有咩分別呀?分別咪係我釣果條係養魚,應該是喺啲魚排走出來,又或者係啲運海鮮魚船跌落海的,而「華少」釣果條是在大海中生長的,點樣睇出分別?因為海「紅魚」是全條魚魚身是紅色嘅,而養魚的「紅魚」是淺啡帶紅色的,大家知道嗎?去到街市買「紅魚」食時就唔會俾人扼啦。

真係好開心,兩兄弟幾乎同一時間起兩條大魚,真係想都未想過,哎呀… 而家先想起應該兩兄弟一齊影番張相架嘛,失察失察!之後仲俾佢哋幾個話:你兩兄弟玩晒啦!唔使理我哋啦!哈哈!我知佢哋都係講吓笑攪下氣氛既。

而「亞平」都唔執輸俾佢釣番條半斤重的「雞魚」,而各人都有釣到好多「石班仔」、「沙立仔」、「石九公」同「加衫魚」,而不時係艇家的對講機,聽到其他釣魚船隻都有大魚上釣,而我哋幾個同艇家都有幾吓斷絲走掉大魚的情況出現添,雖然釣到最後大魚的記錄都係維持住果三條再沒有進帳,但已經好開心,估計今次魚獲都有七至八斤,而當日的大贏家是「華少」囉,佢釣得最多同咩魚都有佢份,連大尾魷魚都俾佢釣到,真係唔夠佢玩,其實係「華少」玩晒就真。

0 comments on “快樂的一天

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: