齊哇哇釣魚會

爆竿雙雄

唉…. 這次可謂雙亡慘重囉!

每逢到咗入秋時分,又係釣鱲魚嘅好季節,而香港地又近市區,又可以俾釣友一放工就可以第一時間作釣嘅釣位其實都有好多,好似西隧咁,呢個地方每年都會出現盛況,皆因每年入秋,一啲識途老馬一收到風鱲群到達,每晚在西隧各處都會出現人潮。

昨天星期日假期,同一個人和華少去咗西隧釣魚,其實一直以來我哋都好想試吓這個被釣魚人士,稱之為巨物聖地的地方,其實去西隧釣魚通常都係玩夜釣,因日間海面上太多船隻往來,而令到海裡的魚唔多會食魚餌,而夜間沒有太多船經過,海裡會較為平靜,魚的警覺性會大大降低,所以好多人都會選擇釣夜晚。

雖然都知道今日可能會打龜收場,所以只是抱著試釣的心態來這裡,起碼下次再來這裡玩夜釣時,都了解到地方特點同點樣行。

一去到當然立即攞支魚竿出來,搵番個唨靚位釣魚喇!之但係西隧的釣位都幾難釣架!因為太多石鈎喇!釣咗大半個鐘都釣唔到魚之餘,仲猛咁鈎石,攪到我哋大部份時間都係整魚鈎。

可能今日的水流太急關係,將我哋啲鉛粒衝晒入石位,就係呢個時候諗住攪番起佢再掟出去之際,唉… 又中招,當我將魚竿揪起呢刻,拍… 一聲,哎呀!好痛呀!我俾支魚竿扑親個頭呀!原來係我揪起魚竿果刻可能太大力喇,攪到爆竿!仲一開幾節!爆竿已經好耐未試過喇,通常呢啲事只會發生係一個人身上架嘛,點解?因為佢係我哋出晒名嘅爆竿王囉!經一項非正式統計,一個人每次去釣魚,爆竿率是百分之二十,亦即是每五次去釣魚就有一次爆竿,唔係點會有爆竿王稱號喎!

好在我今次帶咗兩支魚竿去釣魚,如果唔係真要訓係度晒住太陽,睇住佢兩個釣囉,而華少更興奮地大叫:好嘢!爆竿王終於有接班人喇!吓… 唔係呀!雖然一個人近期係少咗爆竿,但係呢個咁戚猛的稱號都係留番俾一個人啦,我係沉底王唔係爆竿王喎!

釣咗個幾鐘又冇魚又爆竿咁冇癮,只好轉位再行過啲睇吓有冇轉機喇,去到第二個釣位都係咁多石鈎,不過都有少少魚毛食吓餌,都有啲心情繼續釣,但真係太多石鈎喇!三個人一直都係喺度輪流整鈎、整魚絲。

就係呢刻!又傳來一吓慘叫聲!回頭一望!哈哈!你哋估吓發生咩事?

我哋嘅爆竿王返嚟啦!一個人果然名不虛傳,果然係我哋真正嘅爆竿王盟主,而且仲爆得有型過人,每次爆完竿都擺出個有型姿勢影番張相,記錄一番,啊… 唔知今次係第幾次爆竿呢?

今次的西隧試釣可謂雙亡慘重囉!除咗爆斷兩支魚竿之外,鉛同鈎都一樣傷亡慘重,唔怪之得回程時個背囊咁輕啦!而且仲一條魚都冇得攞番屋企,其實都有幾條細魚仔釣到嘅,不過我哋放番生佢哋落海,因為連啲細魚都殺死埋,咁我哋以後就冇大魚釣架喇!咁大家記住如果去釣魚,釣到啲細魚仔時記得唔好整死佢哋,要放番生佢哋落海,知道嘛。

0 comments on “爆竿雙雄

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: