齊哇哇釣魚會

齊哇哇釣魚會維港釣魚比賽

十月二十九日星期日又是我喜愛的釣魚日,而今次的釣點是我哋一直認為是魚穫保證的維港。

為咗今次的釣魚活動玩得更開心,於是我同一個人決定攪個釣魚比賽,等大家除咗開心享受釣魚之餘,亦可以睇吓我哋呢班「齊哇哇釣魚會」會員邊個係釣魚高手。

不過今次的釣魚活動,最頭痛的都是人數問題,因為今次我哋租咗兩隻艇出海,而每隻艇只可容納五個人,所以人數有限,只可招待十位會員參加,始終都唔可以滿足到其他會員,希望下次有機會可以同另一班會員去釣魚啦。

而今次參加嘅會員有昌昌兩夫婦、忠哥哥兩夫婦、家姐、偉哥、「爆竿王」一個人、依唷仔同「雜魚王」華少,咁當然唔少得我呢個會長「沉底王」啦。

而今次我哋釣魚比賽會分個獎,一個是釣魚高手大獎,另一個是團體重量獎,釣魚高手大獎當然是計算個人釣得最大條魚個位啦。

而團體重量獎就以五人一組,將全日的總魚穫重量來計算,無論你釣到甚麼魚都可計算在內。

至於分組方面,考慮到女性的某方面問題,因為今次有三名女士參加,而有一隻艇的艇家亦是女性,所以就編排佢哋在同一組,咁當然佢哋嘅老公就跟埋一齊啦,而且又係一家人添,所以呢組叫「家庭組」。

而我哋呢五個大細路就係「齊哇哇組」,如果比你哋估會是邊組勝出的機會率大啲呢?講真呀!論牌面當然是「齊哇哇組」啦,組員有會長「沉底王」即係我、「爆竿王」一個人、依唷仔、「雜魚王」華少同偉哥。

話明係比賽當然要有禮物喇,於是乎診星期六下午返工前約埋一個人去選購禮物,其實都係想攪吓氣氛開心吓,所以啲禮物都是一啲普通的釣具,咁當然大獎就會買好少少啦,而且仲要大件夾低食!哈哈!買咗一大五細的禮物都係百三蚊都唔使。

而我就親自下廚整咗啲鹵水雞翼同腸仔添,因為次次出海釣魚都係食麵包,食得多都有啲悶,所以整番啲小食比大家食吓,諗諗吓!下次出海釣魚不如帶個爐去煲水沖杯麵食都唔錯喎。

而「雜魚王」華少經過上次係維港釣到大紅魚之後,一真都好想再來釣大魚,於是乎佢仲一早去街市買咗一斤大中蝦添。

當日的天氣都相當唔錯,陽光普照,是釣魚的最佳天氣,當艇家駛到鯉魚門一帶時我哋都不忘影吓鯉魚門一帶靚相。

但係釣咗成個上午,發覺我哋呢組的氣勢大打折扣,只得偉哥、依唷仔同華少一路都有魚上釣,而我同一個人就猛咁打龜,仲不時從艇家的對講機聽到「家庭組」那邊個個都有魚釣到,而且仲釣到幾條大條魚添!

到咗下午時分,最驚喜就是從艇家的對講機,聽到其他艇家的釣友釣到條五六斤細鱗,嘩…… 五六斤細鱗喎!如果比我哋釣到就開心死囉!

於是乎只好出絕招,就是用兩條魚絲一起釣!但係點都估唔到我同一個人的黑運仲未過,兩個人已經用晒兩隻手四兩條魚絲嚟釣,始終都冇魚肯游埋嚟食我倆的魚餌,最終我同一個人繼上星期係「西隧釣魚爆竿」食白果之後,又一次慘敗而回,我就全日釣到的魚可以用一隻手的手指計得到,就係三條如果包埋條雞泡都係四條,真係失敗!一個人都好啲起碼多我幾條。

終於到咗埋岸時間,當然即刻計算一吓兩組魚穫重量啦!

首先睇吓邊個釣到最大的魚得到釣魚高手大獎先,得獎者就是家姐,以一條一斤的細鱗勝出。

跟住就是團體重量獎,好緊張呀!因為就咁睇兩組的魚穫都好難分,只好用磅來計算,噔噔噔!「齊哇哇組」總重量是 5360kg,而「家庭組」總重量是 5400kg。哎呀!輸個馬鼻呀!

真係估唔到比喻為大熱門嘅「齊哇哇組」竟然全部落空,其實都係我同一個人連累大家,勢估唔到今次釣魚比賽爆出個九十九倍大冷門!睇嚟我同一個人搵日要去吓蒲台島,拜下天后娘娘,趕走啲衰氣先得囉。

1 comment on “齊哇哇釣魚會維港釣魚比賽

  1. 引用通告: 一歲喇! – MYSTRONGMAN

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: