齊哇哇釣魚會

爆竿雙雄第二回之黑到痺

古語有云:人有三衰六旺,月有陰晴圓缺。
而我就話:人有三衰六旺,運有高低起跌。
點解?

近排去釣魚真係黑到痺,好似剛過去星期日果日咁,本來想同一個人去浦台島釣魚,順便拜吓神趕走啲衰氣,可惜果日天氣好大風,所以冇去到浦台島,於是乎同一個人走咗去西環釣魚。

其實我同一個人都知,去西環釣魚多數是打龜收場,因為近呢一年來,我哋去親呢到釣魚都冇乜戰績,早兩年都好好景嘅!又有芝麻班、花頭梅班、火點、石狗公、哨牙妹、細鱗、黃腳立、沙鯭咁,都幾多魚釣架!次次都滿載而歸,最叻果次一個人仲釣到條大火點添,但而家 ……唉!

去到西環一坐低,諗住攞魚具開竿之際,就有事發生喇!咩事!咪就係一個人囉。你哋仲記上次我同一個人係西隧釣魚時爆咗魚竿啦!今早佢係釣具舖買咗支新魚竿,原來佢留低咗係小巴度冇攞落車呀!今次都算經典囉!連支竿都未開過就報銷,唉 …… 咦 ……唔係喎!都有開過喎,起碼係釣具舖買時開過來睇呀!好在佢都有帶其他魚竿出來,起碼有得釣唔使返屋企。

睡釣咗個幾兩個鐘,又有事發生喇!今次輪到我喇,又咩事呀!我諗你哋都估到啦,咪就係爆竿囉!有冇攪錯呀!做咩事同一個人咁夾呀,又係新魚竿嚟架!買咗唔夠一星期又報銷,唉 …… 好在今次爆竿時,冇俾支魚竿扑親個頭,都好過上次呀!起碼都只係傷財,唔使傷身,哈哈!

又睡釣多個鐘之後,呢啲係咪叫「一不離二、二不離三」,又 ……又有事發生喇!今次主角係一個人,事件是掃圈,哈哈!勁呀!成支魚竿的圈圈掃淨兩個,變咗支牙籤,一個人果然與眾不同,繼“爆竿王”稱號之後,又有新稱號“掃圈王”。

061130005

今個星期日我同一個人都算黑到痺囉!失竿、爆竿、掃圈,好在唔使食白果,都有幾條魚魚釣到,而呢條就係最大果條,你哋估吓有幾大呀!

061130006

雖然星期日上半部黑到痺,但夜晚就好開心,因為同一個人和依唷仔去咗灣仔德興食火鍋,每位 $78 蚊任點任食火鍋,而九點後入座就收每位 $58 蚊,另芥醬油每位 $8 蚊,酸菜每位 $5 蚊,鍋低每位 $8 蚊,星期五、六及假期前夕每位加 $10 蚊,而佢哋係用電磁爐,所以張檯有好多地方擺嘢食,咁當然啤酒汽水或其他飲料另計啦。

而我哋叫咗個特式湯低叫“葡國豬骨鍋”幾好味,加咗兩次水都仲有好濃豬骨湯味,碟“雪花手切肥牛”好正,而一個人仲特別推薦我試“午餐肉”打邊爐,嘩 …… 原來“午餐肉”打邊爐好好食架!你哋不妨試吓呀!而我就最喜歡果款“澳洲帶子”喇,好鮮甜同好滑口添,同一款叫“小棠菜丸”都唔錯,可惜當晚我冇帶相機出街,如果有帶實影低啲相比大家睇。

0 comments on “爆竿雙雄第二回之黑到痺

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: