情深強話

溫暖的十二月(小健小芝新婚快樂)

二○○六年十二月十五日,期待已久的"原子彈"終於都來臨喇!

小健小芝在此祝你倆
新婚快樂、日日恩愛甜蜜~
三年抱兩、永遠幸福快樂~

0020 一個電話,令到我安排好的行程大打折扣,本想今晚可以早些少收工,早啲回家休息,養足精神參加明天舅仔的婚宴,因為呢排真係訓得好少,但冇辦法啦,打工仔就是這樣,為有快快手手咁做,希望早啲做晒收工啦,但是估唔到收工時已經五點半,只好快啲搭車返到去沖個涼,精神吓啦。

0700 一班兄弟們已經到達小健的家,嘩… 真係好少見呢幾個靚仔兄弟咁準時,就算平時有節目去玩都實有人遲到,哈哈!咁當然我都會有遲到嘅!但今次個個準時到達同個個精精神神,低贊

0730 食飽一餐豐富早餐後,一眾兄弟團和新郎哥乘坐兩部的士出發前往女家接新娘,唔使問啦!我知你哋實會問點解搭的士嘅!原因是實在太早關係啦,而且婚禮主車是在青衣由令一位兄弟做車手,而這個車手是新娘子的弟弟,所以無謂要佢車來車去啦。

0815 新郎及兄弟團到達新娘子家樓下,而攝影師亦都到達,呢個時候當然是一眾兄弟同新郎哥拍吓照啦。

0840 新郎哥與眾兄弟浩浩蕩蕩上新娘子家接新娘,上到新娘子家,我諗我都無需多講啦,就是給眾姊妹團玩新郎哥同兄弟的環節,其實玩新郎哥同兄弟都不外乎果幾樣,例如食香蕉、飲忌廉溝水、要兄弟扮女性、做吓掌上壓等等… 不過今次眾姊妹安排其中一個遊戲都有些少過火,係咩我就唔講喇,無謂大家食唔落飯啦!但身為新郎哥的兄弟當然不會說 NO 啦。

玩完遊戲,姊妹團接過開門利是,新郎哥終於可以入屋見吓個靚靚老婆喇!當新郎哥由岳父大人手中接過新娘子呢刻,我哋當然大聲地叫:咀佢、咀佢、咀佢,哈哈!場面多麼溫馨啊!

1030 準時到達男家,呢個時候多數是一對新人拜祖先,奉茶給新翁新姑及長輩 ,亦是一眾兄弟姊妹可以鬆一鬆抖一抖,兄弟們當然是做吓啲粗重野啦,例如攞住部數碼傻瓜機影吓相或玩遊戲機,而眾姊妹們當然是趁這段時間補吓粉化吓妝啦… 嘻嘻。

1130 精彩囉!期待已久,等到我就嚟連頭髮都冇嘅一杯舅仔茶,終於等到喇!飲完杯茶食埋粒紅棗,嘩… 簡直甜到入心。

1230-1345 中場休息,午膳時間。

1400 出發前往香港公園影靚相及金鐘紅棉路婚姻註冊處舉行註冊儀式,可能今天真是結婚的好日子,一路行一路都見到有許多新人影相,而紅棉路註冊處門外,已見有好幾對新人排住隊等入去註冊,咁講真呀,香港公園呢度影相又真係幾靚嘅,當年我同嬋嬋係大會堂註冊完,都特意前來這裡影相。影完靚相,終於到咗註冊時間,嘩… 成間註冊房間都唔夠位俾我哋,咁又係喎!都成幾十人當然唔夠位俾我哋啦。

1700 到達晚宴場地,各兄弟姊妹分工合作,佈置晚宴場地及準備接待賓客,而我就負責安排晚宴播放的音樂及MV,除了這些工作,今晚亦奉獻咗我人生的第一次,就是上台做一個小趣劇,其實都唔算係劇嘅,只是帶住個面具扮新娘子爸爸上台講幾句說話攪吓氣氛,唔單只我,仲有伴郎依唷仔扮新郎哥爸爸,同兩位靚靚姊妹扮兩位媽媽,諗住都覺得幾得意同幾有挑戰性,所以司儀問我有冇興趣做果時,我一口答應冇問題。

2100 晚宴正式開始啦!當然是由一對司儀上台致歡迎詞同攪氣氛啦,就係呢個時間到我出場喇!初時果幾段都 OK 冇問題,點知依唷仔無端端跳咗一段對白,攪到我接唔到下去,就係呢幾秒時間我係咁笑,攪到我要即時爆肚講落去,之後我最驚是一對靚靚姊妹出場時拉我哋兩個落台時拉錯人,好彩到最後都可以完成任務。

2330 晚宴圓滿結束,這刻真係真真正正可以鬆一鬆啦,唔知係唔係熱鬧氣氛過後,忽然感覺到睡魔急 Call,咁又係嘅都已經直落成三十幾鐘頭冇訓過,唔俾睡魔急 Call就奇囉!

上到巴士諗住好快會返到屋企瞓覺喇!點知去到紅隧口,塞車!咁紅隧塞車都好正常嘅!過咗紅隧應該都好快會返到去,點知今晚唔知整咩鬼,去到黃竹坑又塞、香港仔又塞、連鴨利洲大橋都塞,勢估唔到由旺角返到屋企,足足用咗個幾鐘頭。

0 comments on “溫暖的十二月(小健小芝新婚快樂)

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: