齊哇哇釣魚會

你釣過石九公嗎?

每逢入冬季節到春季的時候,都係釣「石九公」的好季節!咁你哋有冇釣過「石九公」同知唔知「石九公」係咩魚呀!

「石九公」是華南一帶的稱呼,酷似「石斑」魚,但體型較細小,有多個種類,但一般成熟的「石九公」體型有 10 厘米長,如果成長到 15-2O 厘米長的話已經算是大條的「石九公」。

070402001

而「石九公」的特徵是,頭上有刺,第一背鰭大而且硬,魚身的顏色隨環境而變異,如棲息在淺水岩礁的,牠便呈紅色,生息在深水岩礁間的,牠便呈赤紅色,並有深黃色的斑紋。
同種的「石九公」如棲息環境不同,魚身顏色也不一樣,因此不能根據顏色判別品種。
新鮮的「石九公」魚鱗鮮明,顏色較深;不新鮮的色較淡而鱗易脫落,肉質粗不好吃。

有一晚係 MSN 度同一個人傾開去邊到釣魚,因為覺得好耐都冇去過釣魚啦!所以今次諗住去東博玩吓手竿,釣吓「石九公」。

星期日早上我哋如常地都是約埋一齊食早餐,之後出發去釣魚,係食早餐途中我發覺有張餐牌好得意,而餐牌上的內容係關於我叫的餐蛋麵,內容是:建議好味食法:將D公仔麵順時針攬 3 圈,再逆時針攬 1 圈,夾起後“雪雪”聲放入口,碗麵就可以更加滋味啦!

070402002

我就係度諗?乜原來而家食碗公仔麵都咁有學問架!犀利!犀利!不過我冇依照他建議的食法,而係用自己認為食公仔麵最好味的食法:就係“嗱嗱”聲襯熱食咁就最好食!你話係唔係呀!

話時話真係好耐冇嚟東博釣魚囉!係呢度釣魚感覺幾舒服,因為係條提博上幾乎係四面環海,我最喜歡呢種海風吹埋嚟的感覺,仲可以觀賞啲遊艇從港口駛出駛入,更時不時聽到從海洋公園玩過山車人士的尖叫聲。

雖然只是一條港口的提博,而嚟襯呢度釣都只係諗住釣吓「石九公」過吓日晨,但每次係度釣魚都有意想不到的驚喜,就好似華少咁,開竿釣咗冇耐就俾佢釣到條半斤重「畵眉」,叻仔。

一個人仲犀利,只係用手竿係博邊啲石邊位釣,就釣到大「石九公」、「石剎」同「烏絲斑」,仲釣到條顏色好鮮艷嘅珊瑚魚,不過因為唔知條珊瑚魚叫咩魚,又唔知食唔食得,所以都係放番佢落海。

而我同小健就冇咁好運囉!釣來釣去都只係釣到啲魚尾仔,例如「蔬蘿」仔、「石九公」仔同「哨牙妹」仔,條條都係屬於子子孫孫之類,雖然釣到咁多子子孫孫,但係我哋唔會整死佢哋架!我哋會放番佢哋落海,因為連啲細魚都殺死埋,咁我哋以後就冇大魚釣架喇!咁大家記住如果去釣魚,釣到啲細魚仔時記得唔好整死佢哋,要放番生佢哋落海,知道嘛。

我今日都算攬笑喇!連「海旦」都釣到上嚟,真係吹脹!更吹脹嘅就係,使唔使連「雞泡」孫都釣埋上嚟呀!仲要谷到個肚脹卜卜向我示威,見到你條「雞泡」孫,我真係俾你吹脹就真!

070402024

好在我一直釣魚嘅心態都係未到最後一刻都唔會放棄,最終都俾我釣番條似樣啲嘅魚,就係「石崇」,你哋咪睇條「石崇」細條呀!佢身價好貴架!係街市買要成八九蚊一兩,即過係買一斤要百幾蚊架!點解「石崇」咁值錢?因為坊間流傳用「石崇」煲湯,是對剛做完手術的人好有益,可以令患者傷口快啲埋口,所以「石崇」咁值錢囉!

0 comments on “你釣過石九公嗎?

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: