強說強話

我的端午節

端午節最令人熟識的食物是粽子,而端午節最令人期盼的活動便是龍舟競賽。而最令我開心的是可以有一天假期,同我的好舅仔好朋友遊玩一天。

今天一早約定咗聰聰同華少去食早餐,食完個靚靚早餐之後去買燒烤食品,因為今日我哋諗住去南區深水灣游水燒嘢食。

既然今次由我發板買嘢食,而且亦知大家好喜歡食喺石排灣街市買的燒烤食品,所以我都特登去番呢間舖頭買燒烤食品。

唔好話我又係度買廣告呀!講真一句!呢檔專賣燒烤食品的舖頭,真係無邊間可以好味得過佢,點好食法呀!當您哋試過一次就知點解,重點推介首選當然是豉椒排骨、其次就係黑椒雞翼同豬頸肉。

當買好晒所有燒烤食品後,突然收到明明的來電,他說:姐夫冇燒烤爐呀!吓!冇燒烤爐!點算呀!

掛線後不夠三分鐘,明明的專用電話鈴聲又再次響起,冇事啦!有人讓個燒烤爐比我哋啦!聽到呢句簡直放下心頭大石,緊係啦!買咗兩大袋燒烤食品,諗住可以去游吓龍舟水燒吓嘢食,( 雖然我唔識游水,但都想係海灘浸吓龍舟水涼快吓架嘛! )

話時話今日嘅天氣真係好熱,十點零鐘已經烈日當空,成三十幾度,係咁嘅天氣下去燒嘢食,真係有些少過份。好在都有些少微風吹吓,如果真係一滴風都冇,我想都幾難頂。燒咗一陣,佢哋個個都開始換衫去游龍舟水,而我亦都跟埋去係海灘邊浸吓龍舟水,嘩!簡直係天堂與地獄,好涼快好舒服呀!落咗水簡直唔想走番上岸呀!可能係太涼快關係,我大膽地行出咗少少,試吓離地扒番幾吓,睇吓浮唔浮得起,結果飲咗兩淡咸水,趁冇咩人見到都係嗱嗱淋番上岸繼續燒嘢食算囉!

玩到下午五點零鐘,真係好想同佢哋繼續玩繼續燒嘢食,可惜要返屋企食飯關係所以同華少走先,返到屋企沖涼先發覺,大獲啦!成個背脊紅晒,緊係今日忘記係背脊搽太陽油喇!唉!睇嚟個背脊又要痛幾日囉!

其實每年嘅端午節,媽媽都會叫晒我哋返屋企食飯,今晚除咗我哋自己一家外,爸爸仲叫埋兩個姑姐一家來食飯,一聽到叫埋姑姐就即刻問:文傑表弟來嗎?可惜佢今日只係放咗半日假,下午又要返番去警察訓練學校囉!真的好想問吓文傑表弟係警察訓練學校果啲訓練,係咪好似上兩年電視劇集學警雄心的劇情一樣,又會唔會有個真係好似李文昇咁好的教官,不過我相信日後一定會問到佢,因為我係佢嘅 Friend表哥。

今晚媽媽煲咗一煲美味的響螺頭乳鴿湯、滑蛋蒸蟹、白灼海蝦、菜膽雞、海參花膠、冬茹鴨腳、清蒸西曹、咕嚕肉、西芹帶子及涼瓜蝦干炒蛋,九餸一湯白飯任"莊",媽媽的厨藝真係好勁,最後結果都係碟碟差唔多食清晒,實在太美味呀!可惜今日忘記影低咁壯觀的九大鬼菜色,下次有機會一定要影低佢等大家流吓口水先得。

食飽飯後再食埋生果同雪糕,嘩!今日嘅加路里又超標到極點囉!

喺食飯後果的時間,媽媽從手袋中拿出兩封紅利是出來比我,我奇怪地問點解有利是比我呀!媽媽說:你大後日農曆生日嘛!係喎!連自己都醒唔起添,但點解有兩封嘅?媽媽再說:一封你老婆架!你兩個西曆同一日生日嘛!哦!哈哈!想唔到今年會有生日利是收喎!真開心!

今日亦因為做節關係,我哋係安老院接咗嫲嫲來屋企食飯,所以我要送返嫲嫲去安老院,係落的士途中,忽然有一個女孩子來幫我扶嫲嫲落車,回頭一望,原來係冇見很久的叔伯亞妹,第一眼望佢真係認唔到佢,過咗兩秒先認得係佢,雖然她是我亞叔個女,但平時都好少接觸,只是大時大節例如過年或嫲嫲生日先可能有機會見到,況且我的工作時間都是夜晚,就算是有什麼節慶夜晚食飯我亦未必會出現到,所以一時間認唔出都唔出奇。

之後亞妹仲陪我一齊帶嫲嫲返安老院,去到嫲嫲房間我同亞妹傾咗一陣,我發覺佢真係長大好多,比起佢以前細個的小姐脾氣,簡直是兩個人好健談,以前細個好難會見到佢笑,但今晚佢有傾有講有笑,到我走時佢話留多一陣陪嫲嫲傾偈,睇嚟亞婷真的長了,希望下次有機會係啲家庭節慶聚會能再次和她傾偈啦!

講咗成日嘅端午節,由朝講到晚,大家有沒有留意到一樣野呀!無錯喇!點解唔見我講嬋嬋嘅!係因為嬋嬋今日陪外父外父母去咗大陸玩呀!所以咪得我一個囉!

0 comments on “我的端午節

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: