齊哇哇釣魚會

主場威力真係唔簡單

唔知係唔係近來的天氣太過熱的關係,攪到近排都冇乜心情去釣魚,每當星期日訓醒望出窗外,看見個咁猛烈嘅太陽都已經怕怕。不過真係好耐冇去釣魚啦!所以今日無論幾熱幾猛太陽都好,都要去釣番日魚先。

2007 年 7 月 22 日星期日,今日又約咗爆竿王、依唷仔同華少去釣魚,而今日釣場係華少個主場牛奶公司雪廠。

其實今日本來諗去火爆島釣魚嘅,但係食早餐途中傾吓傾吓,如果去火爆島實曬到變燒豬喎!於是華少提議不如去牛奶公司雪廠釣啦!起碼有瓦遮擋而且一定唔會曬到變黑炭頭,於是食完早餐買埋魚餌去牛奶公司雪廠釣魚。

隔咗成個幾月咁耐冇釣過魚,一去到當然即刻攞魚具釣魚啦!

釣咗一陣到即刻有收穫是「石九公」一條,係邊個?當然係華少啦!話晒都係佢主場嘛,之後又釣多條「石斑仔」,跟住連爆竿王、依唷仔都有收穫,又「石九公」又有「石斑仔」,而且佢哋仲有兩三次感覺到有幾大的魚訊添,可惜上唔到釣。

這刻華少從遠處笑笑口走過來,手持一條成半斤重的「青斑」,勁呀!主場即係主場,果然有主場之利,再過一陣看見依唷仔呆咗一呆,原來依唷仔今次感覺到好強烈魚訊,可惜都係上唔到釣,只聽到佢猛咁叫哎呀!哎呀!好大力咬呀!睇來如果俾佢釣到上來起碼兩三斤重都有,真可惜。

講到呢度大家係咪覺得好奇怪,點解唔見我講自己有魚釣到嘅?無錯!你哋估中咗,我係一直都未有收穫,而且仲成日係咁鈎地,不停地係度整魚鈎,唉… 心諗莫非今日又食白果糖水,正當我繼續呆著等魚上釣之際,爆竿王又有魚上釣呀!見佢扯咗一陣,忽然間停咗手唔扯喎!原來條魚入咗石位,不過佢今次好有耐性等條魚走番出嚟,終於爆竿王又成功地起番條「青斑」。

070723001

釣到兩點幾已經開始覺得有啲肚餓,於是乎叫華少打電話搵嘢食,搵咩嘢食?就是香港仔避風塘特色美食艇仔粉,不過呢隻艇仔粉唔係香港仔海濱公園泊係碼頭果隻,係另一隻日間專做漁民生意的,味道有點唔及得香港仔海濱公園泊係碼頭果隻,不過都幾好味,湯底都唔錯,如果唔好味我又點會連湯都飲清晒呢!

食完艇仔粉後又繼續再釣過,希望食完碗美味艇仔粉後可以改變一吓運氣啦!釣咗一陣依然冇乜起色,忽然華少見到我個魚排係咁走動,於是佢連忙把電話掉咗落地上,三七廿一咩都唔埋係咩扯,見佢扯到咁上下我當然攞番條魚絲扯番吓啦!哈哈!終於都俾釣番條魚啦!「連尖」一條,嘩!真係一額汗,幾驚今日又食白果糖水呀!好彩都有一條都算有啲交代。

不過全日釣得最多都係華少,主場嘅威力真係唔簡單,睇嚟下次去釣魚都要搵返自己個主場先得囉!釣到咁多魚爆竿王提議今晚不如攞幾條大去大街食飯囉!咁當然要啦!難得釣完魚大家又冇約人出街,一於去食餐勁嘅!於是釣完魚就各自返屋企先,沖個涼休息一吓!晚上齊齊去大街發仔記食飯,而我哋食啲乜?先嚟一碟豉油王炒麵,跟住什菜煲、黑椒牛柳粒、椒鹽肉排、油爆魷魚仔、紅燒豆腐、薑蔥炒蟹同埋青蒸自來海上鮮。

0 comments on “主場威力真係唔簡單

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: