齊哇哇釣魚會

重遊西貢三星灣

二○○七年七月二十九日星期日 (晴),今日我哋又再一次重遊舊地,邊處? 之唔係有得釣魚,又可以 BBQ 嘅西貢三星灣釣魚會俱樂囉!

070731001

今日我哋一行九人準時於早上九點半於旺角集合食早餐,之後再乘小巴去到西貢白沙灣下車,再步行出碼頭,乘坐免費街渡去三星灣漁排,原本今日的節目除了係漁排釣魚和BBQ外,佢哋仲諗住玩吓快艇水上活動,例如滑水、水上飛碟、飛毯、梳化同香蕉船等等!所以佢哋都有帶定晒泳衣去,諗住去到問下睇吓有冇得玩,一嘗炎炎夏日的水上活動樂趣,可惜因為我哋去之前都未知邊個會玩水上活動,所以無預約度安排這活動,結果當然係冇得玩啦!

雖然今次佢哋玩唔到水上活動,但一啲都無影響到各人嘅心情,上到漁排各人已經急不及待攞出釣魚用具出嚟,開竿,整魚鈎,落竿釣魚,而我就當然立即整好支魚竿俾嬋嬋釣魚啦!雖然今日嘅天氣都幾熱,但勝在有啲海風,而且個個都搽晒太陽油,應該唔會有人曬到變燒豬!

 

釣咗一陣就已經有人釣到魚喇!係邊個?咪係嬋嬋囉!你睇吓佢釣到條「芝麻斑」幾開心!之後連聰聰都釣到條「花頭梅斑」,勁呀!睇嚟今次應該唔會有人無魚上釣掛!估唔到今日咁好魚穫,人人放條漁絲落海都幾乎有魚上釣,而且大部份都係「石斑」,不過好多都係「石斑」毛!

但有樣嘢好奇怪囉,佢哋全部都釣到魚,而且仲唔係細魚添!而我就一直都冇魚上過釣,一直係咁打龜,看到其他釣友不停有魚上釣,有個仲釣到條斤幾重「黃立倉」添,攪到我迫不得已要出殺手癎,就係除咗件衫用我嘅豬腩肉引誘啲魚食魚餌,可惜可能啲魚都覺得我嘅豬腩肉身軀太油膩關係喇!點都唔肯游埋嚟食我嘅魚餌,始終都係個句,釣魚都是人等魚,唔係魚等人。

070731006

雖然我一直都冇魚上釣,但我哋九個人齊哇哇圍埋一齊釣魚,有講有笑都幾開心。釣到五點鬆左右,我終於打破釣唔到魚嘅黑運啦!臨尾俾我釣番兩條手掌大嘅「火點」,開心到我見牙唔見眼!哈哈!

 

唔知係唔係到咗黃昏關係,啲大魚開始出來搵嘢食,臨走時偉哥有一吓好大反應的魚訊,可惜佢條魚絲太幼喇!拍一聲俾條魚扯斷魚絲,唉… 真可惜。

係漁排玩完釣魚之後,我哋又再一次坐番隻快艇去三星灣碼頭的燒烤場燒嘢食,今次除咗燒烤場提供嘅雞翼、豬扒、牛扒、豬頸肉、雞扒、香腸、紅腸及各式各樣丸類之外,我哋仲將今日釣到的魚攞嚟燒添!嘩!好香!好好味呀!

 

係燒烤場玩到九點幾大家都已經食到飽飽,玩咗成日真係好累,好想快啲返屋企沖過涼大覺訓呀!

0 comments on “重遊西貢三星灣

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: