齊哇哇釣魚會

三星灣夏日釣魚燒烤

二○○七年八月二十六日星期日 (晴),亦是農曆七月十四盂蘭節(俗稱鬼節),即是流傳至今的鬼門關開的一天。

一直以來有很多老人家都說,係呢個七月千萬不要去夜街,不要落水玩水上活動,因為怕有危險!對於迷信嘅人嚟講,的確係好危險!不過對於我哋呢班貪玩嘅齊哇哇大細路嚟講,日光日白,而且個個行得正企得正,使乜驚喎!更何況只要凡事加多小心,相信唔會有咩危險嘅!

今日我哋又再一次出發去西貢白沙灣「三星灣釣魚會俱樂部」遊玩,而且今次仲要玩埋水上活動滑水添!

雖然我一直以來都好想試吓玩滑水的滋味,不過今次我冇參與玩埋一份,唔係因為我唔識游水而怕玩,其實我已經有心晒心理準備玩這水上活動,但今次因為我諗住要照顧一些唔玩滑水而留係漁排釣魚的女仕們,例如嬋嬋同喵喵,所以一早決定唔玩,因為如果我同聰聰和依唷仔都去玩埋,就冇男人照顧留係漁排釣魚呢兩個女仕,雖然嬋嬋今次冇去到,但仲有隻小喵喵,我點都要盡一盡大哥哥的責任照顧佢嘅,所以我覺得我嘅決定係啱嘅!

不過當我看見佢哋係滑水時影嘅相同短片,真係有些少後悔冇跟埋去玩滑水,不過雖然今次玩唔到,但我相信下次佢哋再攪有玩滑水嘅活動,我一定會去玩,而家只好睇住聰聰影嘅短片望梅止渴啦!

講番正題先!今次再去三星灣除了我哋四位齊哇哇釣魚會經常的主要成員外,今次仲加入咗一批新表弟表妹一齊玩,而這幾個表弟表妹都玩得好開心,同我先前諗的一樣,真係擦出咗令一種開心快樂火花。

而我哋呢班貪玩嘅齊哇哇大細路,一上到漁排,留係漁排釣魚果幾個已經急不及待攞出釣魚用具出嚟釣魚,而玩滑人果幾個就等快艇來,但想唔到今次我幫喵喵整好支漁竿比佢釣咗都唔夠三十秒,佢竟然咁快有漁上釣,又係「石斑仔」一條,雖然係細條咗啲啲!但始終釣魚就是這樣,無論釣到幾大同幾細條魚都好,都一樣是咁興奮咁開心,你睇吓佢釣到條「石斑仔」幾開心!

而係佢哋幾個等快艇來之前,聰聰仲示範一吓滑水的基本動作同姿勢,講解一吓怎樣容易上水。

快艇一到佢哋幾個就起程去玩滑水,而我就留守漁排照顧幾個釣魚初哥,但真係好唔明白,係咪我一直以來都是用大的魚鈎關係,釣咗好耐好耐都依照無魚釣到,眼見其他人都耐不耐有「石斑仔」、「三蘇仔」同「石九公」釣到,但諗深一層,我無可能為咗有魚上釣而放棄用大魚鈎架嘛!萬一一個唔覺意走條大魚埋嚟食餌而又鈎唔到佢咪白癈心機,所以就一直呆等呆等呆等咁呆釣咗兩個幾鐘頭,好在簡唔中喵喵都釣到啲魚毛仔,叫我幫佢解魚同埋整吓魚鈎,如果唔係真係坐到訓著覺都似。

070828009

等咗咁耐都無發市,一直都係比啲魚毛仔食晒啲魚餌,只好不停地轉位又轉位,終於比我搵到個有強烈魚訊的釣位,但這強烈魚訊有些少古怪,很大力,但我一拉一拉魚絲就無反應,心諗!唔通係「大尾魷」或者「墨魚」之類,因為「大尾魷」同「墨魚」都很喜愛食基圍蝦的,可惜我今日忘記帶八爪鈎,不過我諗起依唷仔可能會有喎!於是摷吓摷吓終於比我搵到個八爪鈎,於是我想到用一些特別的釣組,將隻基圍蝦放係八爪鈎之上,一直試用唔同的方法,終於試到第七次終於釣到佢啦!可惜鈎唔實俾佢走鬼咗!

係呢個時候去玩滑水嘅表弟表妹都返晒嚟喇!而且仲係燒烤場度外買咗餐蛋麵返嚟做下午茶添!食完這個醒神的餐蛋麵後,於是我不死心地繼續用這方法,希望將它釣上嚟!終於我用咗第二十幾隻基圍蝦,YEAH!釣到啦!而聰聰見到我釣到就立即走去攞撈箕,見到啦!原來係一隻半斤度嘅大「墨魚」,係上水的一剎那,隻大墨魚嘖到成海烏卒卒,當聰聰用撈箕撈起隻墨魚上來後,我諗住佢係水面都已經嘖咗一大堆墨汁,唔會再嘖架啦!點知我諗住拎起佢叫佢哋同我影相之際!嘩!大檸樂!隻墨魚居然再次向我嘖墨汁,結果我閃避不及俾隻墨魚嘖到我一身都是墨汁!早之等隻墨魚穏定下來先影啦!而家攪到我右半身成條褲同對鞋!唉… 最後因為忙著抺走條褲同鞋嘅墨汁,攪到咁珍貴難得嘅相都唔記得影,失策!失策!

不過見到啲表弟表妹玩得咁開心,而且又係個個都有釣到魚,雖然啲魚係好細條,而且大部份都係「泥鯭仔」。但係能夠可以一班人開開心心享受到釣魚嘅樂趣,都唔錯架喇!

係漁排釣完魚跟隨當然是去燒烤場燒嘢食啦!而係燒嘢食之前,聰聰同依唷仔係石灘度玩近期 YouTube 熱播短片「當萬樂珠遇上健怡可樂」,就是將一筒薄荷萬樂珠放入一支 1.25 公升的健怡可樂度,可惜現場睇的效果唔係咁好,但依唷仔的攝影技術果然了得,從這張相片的效果來睇又幾靚喎!

070828021

試玩完當萬樂珠遇上健怡可樂後,就去燒嘢食,雖然今次冇上次咁好魚獲可以有魚燒,但有令外一種海鮮燒嚟食,就是這隻嘖到我一身墨汁的「墨魚」,一於燒咗來食,來發洩我的氣憤!不過燒起上來又真係幾鮮味,好香!好好味!

070828022

燒完嘢食大家都提議不如係白沙灣搭車落西貢食甜品,食咩甜品?當然是西貢出名的滿記甜品啦!而且係西貢市中心會容易啲有車出九龍轉車返去香港南區,而我當然亦要外買咗一份楊技金露比嬋嬋啦!

0 comments on “三星灣夏日釣魚燒烤

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: