齊哇哇釣魚會

年初十維港釣魚

想不到這個農曆新年假期竟然會凍足咁多日,不過好在到假期尾的一天氣溫終於都回暖。

二月十六日年初十 (星期六) 陰,吹清勁的偏北風,雖然都仲係有啲凍意,但始終沒有影響到我哋"齊哇哇釣魚會"去釣魚的心情。

這天約咗爆竿王(聰聰)、雜魚王(華少)和小健再次出維港釣魚,因為真的好唔甘心係年初四那天在西貢三星灣漁排釣魚,竟然咁多人食白果,雖然果日我都釣到四條石斑仔,但無理由新年流流攪到各"齊哇哇釣魚會"成員咁失威架嘛!

於是趁住這天天氣回暖,而水口又暖番少少,應該啲魚會開始開口食餌,因為之前凍咗咁多日,啲魚如果感覺到水溫回暖,一定會開口食餌,如果撞正水流啱的話應該會有所收穫。

我哋亦都一如以往去到西灣河食埋早餐買好晒嘢,就係西灣河水警碼頭上船,上到船船家華姐就問我哋:「你哋想係維港裡面釣定出出港外釣呀!」於是各人都不約而同地說:「一於出去試吓啦!搏吓有冇大魚都好呀!試一陣無再返維港囉!」

終於我哋就駛出港外釣,可惜釣咗個幾鐘都無咩起色,於是爆竿王(聰聰)就提議:「咁嘅環境不如趁早返維港釣啦!」好!各人都舉腳贊成。

一返回維港釣果然唔同,釣咗一陣,第一個釣到魚先依然是華姐,跟住雜魚王(華少)亦都唔執輸,又「黃斑仔」又「石九公」,再過一陣連爆竿王(聰聰)都密密手上魚,果刻真係睇到我心都紅埋,可惜只淨低我同小健未有魚上釣,只好繼續努力,希望快快釣到第一條魚。

就係呢刻,看見雜魚王(華少)神色緊張地起絲!見他一手一手慢慢地扯,起初諗住都是大少少的魚啦!雖不知他扯到咁上下就大叫,攞撈箕呀!吓!攞撈箕?攞得撈箕我諗條魚最少都斤幾兩斤重啦!於是我即刻攞定撈箕等它起水,嘩… 見到啦!原來是斤幾重「紅魚」一條,雜魚王(華少)果然勁呀!

當雜魚王(華少)釣咗條「紅魚」之後,我同小健都開始相繼釣到魚啦!其實可能是轉流水關係,係呢個零鐘裡面,你一條我又一條,確實又真係幾開心架!

而我今日最開心都係起雙飛呢一吓!一條魚絲中兩條魚的感覺真係好鬼史正!

080221005

雖然今日的天氣是回暖咗少少,但機本上都幾凍吓,好在中午時段出咗少少太陽,但到咗下午時段又大風咗好多,而且間中吹埋嚟啲風都幾寒吓,不過總括嚟講今日的收獲都算幾豐富,係咁凍嘅天氣環境底下都有成八九斤漁獲,比預期中好,如果今日的水溫唔係咁凍,我諗收穫應該仲多好多,希望下次再去維港釣魚唔好又撞正咁凍嘅天氣啦!

0 comments on “年初十維港釣魚

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: