情深強話

我倆的生日2008

2008年5月31日的今天是屬於妳和我,亦都屬於今天所有生日的每一個人!

今天亦都一如以往陪伴嬋嬋去海洋公園遊玩,雖然今天的天色很陰,而且偶爾間亦有些少微雨灑下,但亦都沒有打擾到我倆開心快樂的心情。

080531001

其實每年的今天去海洋公園遊玩真係好開心,不過我諗最開心的應該會是「何包大人」,因為我倆可以免費入場,咁您話係咪佢最開心呢!嘻嘻!

今天可以說是由由朝玩到晚,而第一個景點是熊貓館,說起來真的有點兒大鄉里,因為我是第一次去熊貓館睇熊貓,看到樂樂、盈盈、安安和佳佳咁可愛得意的熊貓,真係幾開心。最攪笑我想都是樂樂,當時樂樂正在食緊竹葉,忽然間轉身行去大樹旁邊坐低,背向著我哋,起初仲意為我哋啲影相機嚇親樂樂,跟住再睇真啲!原來唔係呀!係樂樂要去大便呀!哈哈!真想不到第一次睇熊貓就咁難得見到這情景,我仲立即影低咁難得一見的情景添!

080531002

睇完熊貓之後諗住搭纜車上山,點知纜車站大排長龍,如果要排隊等坐纜車都要成大半個鐘先有得坐。於是我同嬋嬋就諗住返去正門度搭免費穿梭巴士去大樹灣入口,搭登山電梯上山。

去到大樹灣入口,當然就唔會即刻搭登山電梯上山啦!我哋係集古村行咗一陣,又去咗紅鶴池睇「紅鶴」,跟住走去海洋探索營睇「鯆魚」。

您可能會問「鯆魚」係咩嚟架?其實「鯆魚」亦即是我們所認識的「魔鬼魚」的其中一種近親魚類,魚身扁平,鰭如翼,身形似三角或飛碟狀,尾長帶有毒刺 。常棲身於熱帶水域,而在香港水域出現的「魔鬼魚」種類繁多,估計至少有十多種,而這些「鯆魚」是香港水域最常見的一種。

080531013

而今次係呢度唔單只可以看到「鯆魚」,而且仲可以親手接觸「鯆魚」添!因為「魔鬼魚」或「鯆魚」本身是喜歡在水面活動的魚類,不論在深水或淺水的水域,亦都可以發現牠蹤,但如果要接觸「魔鬼魚」或「鯆魚」,有一樣是要特別注意,因為牠的尾部的刺是含有毒性的,所以觸摸牠時要特別留意唔好被牠的尾部的刺傷。

接觸完「鯆魚」之後,就開始搭登山電梯上山,本來諗住係第一層的位置玩「滑浪飛船」,可惜我和嬋嬋都沒有帶備多一套衣服,諗諗吓如果咁早玩到濕身或作弄濕衣服,之後的時間會好辛苦,所以決定都係留番下次再來先玩。

再上一層到咗另一個機動遊戲「越礦飛車」,可能因為尚算早的關係,唔係有太多人排隊玩這機動遊戲,所以排咗很少很少時間就可以玩到。雖然這機動遊戲「越礦飛車」朋友們都說只屬於小型過山車之類,但對於我來說經已是一個極高難度的自我挑戰,因為您哋咪睇我個人大大隻隻咁 ( 其實是肥胖 ) ,其實我真的很怕玩呢啲咁刺激的機動遊戲,但為了陪嬋嬋玩,唯有硬著頭皮死橕啦!

第一次玩這機動遊戲「越礦飛車」,起初都唔係咁驚,仲識睜開對眼,但當架車轉完果三個圈之後再向下衝果一刻,真係成個心離一離,感覺好像被拋起拋出車外咁,之後就一路合埋雙眼係咁狂叫好驚呀!好驚呀!玩完這個咁令我驚心動魄的「越礦飛車」之後,我肯定我真的是一個很膽小的人。

跟住我就同嬋嬋去咗「太平洋海岸」觀賞海豹和海獅,這個「太平洋海岸」是海豹和海獅的家,環境是仿照牠們的自然棲息地而建設,有巨型大石和人造浪,我們可以從近距離觀看海豹和海獅之外,亦可從玻璃管道欣賞牠們在水底的舞姿。但我好像聽朋友說過這裡有企鵝睇的,唔知係咪因為夏天關係而沒有企鵝呢?

080531022

不經不覺玩咗成個上午差不多有點肚餓添,於是我同嬋嬋兩個就傻更更咁走咗入呢間灣景餐廳食午餐,這間餐廳都幾有特色,餐廳內設有兩個大型水母缸給遊客觀賞小水母,雖然看起來不及水母萬花筒館內咁多采多姿,但亦都相當吸引。而且仲有 270度開揚無敵大海景,感覺尚算舒適。

而這間灣景餐廳是採用半自助形式,遊客在自助餐廳內挑選完食品後再到收銀處付款,而食品菜式方面,多以東南亞菜為主,不過食物質素我覺得只是一般,但最令我驚訝的是價錢方面,真係食落口的每一啖飯,每一啖飲品都非常乸利囉!唔信你睇吓張單!

食飽飽後就繼續下午的行程,自從 06年的今天去過一次「水母萬花筒館」之後,很想再去觀賞那繽紛美麗的水母世界,因為覺得啲水母真的好靚同好得意,唔知您哋覺得係唔係呢!

跟住當然是要去我最鍾意睇的海洋生物啦!係咩?仲使問!之唔係「海洋館」同「鯊魚館」啦!因為這裡你會觀賞到數十種來自世界各地的鯊魚和數千多條各式各樣大大小小的珍貴魚類,而每次來到這裡看到這麼多的魚,心裡面會想,如果有一處地方可以有咁多魚釣就好囉!

觀賞完咁多魚魚之後,就更係要去欣賞海洋公園最受歡迎的景點之一「海洋劇場」啦!看見啲海豚和海獅跳躍翻騰,精彩絕技的表演,我相信每一個觀眾都會目不轉睛地看到拍爛手掌。

睇完「海洋劇場」之後就馬上趕去搭纜車下山,因為當日在場有廣播說海洋公園因為進行擴建工程,所以纜車只作單線行駛,而由開始排隊等候到坐纜車下山足足要成個鐘以上時間,不單只咁呀!我坐果時架纜車仲要係路軌度停留咗幾次,攪到我要扶實個扶手,唔敢望落下面,攪到個心卜卜係咁跳!仲要俾嬋嬋影埋相,真係失禮史人,當架纜車落到山個心先至平靜下來鬆一口氣!

最後我同嬋嬋再去埋「兒童王國」繼續享受埋這天的歡樂時刻同影相相。

嬋嬋,雖然今年的生日和妳在海洋公園渡過,但我知道妳是一個很樂於享受平凡的女人,我希望係將來的日子,可以令妳係平凡中得到快樂,嬋嬋生日快樂~

0 comments on “我倆的生日2008

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: