齊哇哇釣魚會

爆釣南丫島

每一個喜歡釣魚的發燒友,總會很享受每次出海釣魚帶來的滿足感覺,又或者是嚮往在大海那無軀無束的感覺。但總不會有一個釣魚人士喜歡打龜的感覺,因為他們每次出海釣魚,總是希望能夠滿載而歸。

這天我哋呢班"齊哇哇釣魚會"成員,就趁著今天端午節翌日假期出海釣魚,這天的天氣尚算是不錯,雖然多雲,但短暫的時間也有陽光出現,吹和緩的南風 3 至 4 級,這些天氣其實是很適合出海釣魚的天氣。而這次出海我哋不是去去開的維港,而是係香港仔上艇去南丫島水域釣魚,其實我哋呢次出海諗住去浦台島附近的水域釣魚,但因為吹 3 至 4 級的南風關係,所以選擇去南丫島釣魚。當艇家駛到去南丫島以北的水域時,發覺係南丫島的北角咀水域附近,集中咗幾隻艇係到釣魚,其實當見到有這些情景出現,我哋都知這裏一定有魚釣,而且艇家亦都同我哋講這一帶近兩日有很多「大沙立」釣,所以就有咁多艇係度釣。於是我哋決定係度釣吓先,艇上六人亦都即刻放絲作釣。

起初都祇是釣到一啲「沙立仔」同「石九公」,釣咗一陣見冇咩起色,而且發覺亦都唔係咁密口食餌關係,於是艇家叫我哋收絲轉移第二個釣位。
去到第二個釣位果然有啲起色,各人都釣到啲大條「石九公」同「石斑仔」,而且仲幾密口食餌。不過總係沒有大魚食餌的感覺,雖然係呢度各人都有魚上釣,但沒有大魚上釣的感覺總是欠缺一點點。

釣咗大概大半粒鐘左右,艇家收到消息話之前那處開始有人釣到「大沙立」,於是我哋又即刻駛返去再釣過,去到釣咗一陣,果然俾我哋釣到大魚上艇,登!登!登!「大沙立」一條,係邊個釣到?之唔係表哥囉!

跟住都見到其他艇陸續都有人釣到「大沙立」,但釣多一陣之後,可能係流水轉咗的關係,之後都沒有再見到有人釣到「大沙立」,而且連一些細魚都沒有上釣,於是艇家叫不如駛番去之前果個釣位繼續釣,各人都舉腳贊成,起碼係果個釣位衰極都有「石九公」同「石斑仔」釣下。不過釣來釣去都是「石九公」同「石斑仔」始終都覺得無咩手感,而且又咁難得有機會同一班志同道合的釣魚老死一齊去釣魚,當然想人人都釣到大魚啦!而艇家亦都有同感,於是我哋再去尋找另一個釣位。去到另一個釣位果然唔同,釣咗一陣間時間之後,聰聰、華少同表哥相繼咁釣到「大沙立」,仲要係呢個起完條魚上艇,跟住又到另一個大叫中魚呀!快啲準備撈箕,果一刻的心情真係又興奮又開心。

而華少仲更加勁,竟然有兩次俾佢起到雙飛。不過講到最勁都係偉哥,釣到條兩斤幾重「細鱗」,起初我哋都唔為意佢中咁大條魚,只係見佢攪魚竿時不停地就住嚟攪,但睇睇吓覺得有點唔對路喎!於是就叫表哥幫佢用手起絲,當起到就嚟上水面見到條魚影時,各人都嘩聲四起,猛咁叫撈箕!撈箕!快啲攞撈箕呀!跟住點?當然成功地將條大「細鱗」收服啦!之後見到偉哥個樣幾開心呀!咁緊係啦!咁難得釣到條大「細鱗」威盡全場喎!緊係開心啦!即刻影張靚相先!

但到咗呢個時候,只係得我一個未有大魚上釣呀!眼見隻艇前後左右都釣到大魚,獨係遺留我一個冇大魚,點得架!話晒我都係"齊哇哇釣魚會"會長喎!點可以咁失威架!莫非又要我出絕招。不過好彩釣多一陣之後,我感覺到我的手上魚絲有動靜喇!我感覺到有條魚含住我隻生蝦,我靜心等待它進一步食餌,因為有時啲魚唔會即時一啖食魚餌,佢會含住魚餌一陣,就係呢刻感覺到它大咬一口,於是我手起一扯!中魚!終於都輪到我釣到「大沙立」啦!哈哈!真係幾驚個個有我冇呀!

13657-1417076

釣到下午四點幾左右已經用所有生蝦魚餌,真的沒想到係短短果兩三個小時內,竟然有咁理想的漁穫,估計今次爆釣的漁穫超過四十斤以上,而釣得最多依然係華少,佢個人都已經釣到十幾條「大沙立」,細魚都未計在內,今天各人真係過足晒癮,真係有史以來都未曾試過有咁好的收穫,而家諗番起都識得笑。

不過呢啲咁既情景真係百年難得一見,就好像早排頭條新聞報導,三名釣魚發燒友在香港水域釣到一條重八十五公斤,身長超過五呎長的巨型「黃鰲魚」一樣,不過我哋釣呢啲「大沙立」就沒有「黃鰲魚」個《魚鰾》咁值錢囉。

0 comments on “爆釣南丫島

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: