強說強話

悠長假期的第三天

七月三日 (晴) 悠長假期的第三天。今天依然跟平時一樣,睡到十一點零鐘起身,一起身第一件做的事唔係去洗手間刷牙洗臉,而係開啟 MSN Messenger同朋友仔說句早晨,唔知您有沒有這個習慣呢?不過睇嚟我要慢慢,啊!唔係!應該是盡快開始轉變一下生理時鐘先得囉!

同朋友仔係 MSN傾咗一陣之後就落咗街行咗一陣,跟住又返番屋企煮公仔麵當午餐,食完之後再同部電腦做埋一些更新,攪掂晒,而家部電腦又快又爽,簡直好似一部新電腦一樣,正!

攪完部腦又再瞓多一陣,之後搭車出銅鑼灣等埋嬋嬋同聰聰收工,一齊去旅行社睇月尾去長隆的資料,睇咗兩間旅行社,第一間都唔錯,有晒我哋想玩的節目,例如有:長隆水上樂園、長隆大馬戲和長隆歡樂世界,不過就連帶有一兩個購物景點,所以諗住再睇吓有冇第二間旅行社啲團,唔使去購物景點。

去到第二間旅行社睇到有一個團係唔使前往去購物景點,至玩的節目亦很啱我哋心水,第一天去長隆水上樂園同睇長隆大馬戲,第二天就去長隆歡樂世界玩機動遊戲,正!最重要係唔使去購物景點遊覽,可以有更多時間玩,經我哋三個人你眼望我眼之後就決定揀選呢個團,不過仲要再問清楚其他想去的朋友意思如何,不過我相信應該沒有太大問題,應該可以去得成。

睇完團之後就係銅鑼灣搵地方食晚飯,因為時間尚早關係,而且仲要諗方法嚟打發兩個鐘的時間,點解?因為買咗飛睇戲囉!所以就諗住搵啲可以食到咁耐時間的地方,最終揀選咗去食任飲任食的韓國燒烤,呢間位於銅鑼灣京華中心的韓國燒烤環境都幾舒適,而且亦有好多嘢食,以每個人計百鬆蚊價錢嚟講食足個半小時已經是不錯,整體都幾滿意,應該有機會再去食多次。

食飽飽之後嬋嬋就返屋企先,而我就同聰聰兩個大男人就去睇戲,而今晚睇的戲是我最鍾意的「韋史密夫」主演的《Hancock-街頭超人》。

一直以來都很喜歡看「韋史密夫」演的戲,而且上次套《魔間傳奇》真係演得好好,我諗呢套《Hancock-街頭超人》應該比到我更大驚喜,我估應該唔會令到喜歡「韋史密夫」的 Fans失望。電影一開始就來個緊張震撼警匪大追逐,而故事就講述「韋史密夫」飾演的享哥,衣衫襤褸滿面鬚根像是乞兒一樣,睡在街頭的長椅上,連路過看見他的小孩子都看不起他罵他。

但他是擁有比超人更利害的身軀,刀槍不入和擁有巨大神力,而且仲比噴射機飛得更快的能力,不過他在打擊壞人時不懂得好好利用這獨有的能力,常常為了用最直接的方法去捕捉匪徒時造成嚴重的破壞,令到所有人都憎恨他。而係一次拯救行動中,令到一名做公關形象推廣人對他另眼相看,為報答享哥對佢救命之恩,便要決心改造這位街頭超人。

諗諗吓都係唔好講晒咁多劇情出來,無謂令到大家入場睇時無晒驚喜,總之這套《Hancock-街頭超人》無論是劇情和特技都做得非常好,整個故事都幾流暢,而且後半部的三角關係劇情都會令觀眾有很大驚喜,有笑位亦有感動位,是一部好值得推介比大家比錢買飛入場睇嘅戲。

0 comments on “悠長假期的第三天

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: