齊哇哇釣魚會 強說強話

釣得開心食得滿足長洲一天遊

2009 年的第一個星期天,我哋呢班大細路又去了長洲玩啦!而且今次終於都可以一嚐係長洲釣魚的滋味,雖然這次釣的都是魚毛仔,但都釣得幾開心,況且釣魚始終都是享受過程中帶來的樂趣。除了釣魚之外,當然仲唔會少得大吃一番啦!

這天一早係中環食早餐,之後出發去長洲。真的沒想到星期天的中環早上是咁多人,連快餐店都是迫滿人食早餐,不過就唔係香港人,而係有很多很多的菲律賓人,由畢打街行到去德忌利士街這短短的幾條街,給我的感覺是好像去了菲律賓一樣。前後左右路過的都是菲律賓人,幾經辛苦先可以搵到間沒有太多菲律賓人聚集的快餐店食早餐,唔怪之得啲人話想感受一下菲律賓的氣息,最好是星期天去中環啦!

去到長洲一落船第一時間就馬上去訂香草羊鞍,其實這次落長洲最大的原因都是為了食燒香草羊鞍,因為實在太耐冇食同太想食啦,尤其是燒嘢食時燒香草羊鞍,果種濃郁的香草香味,簡直是沒法子形容,仲之燒過一次之後你一定會愛上佢。

訂完香草羊鞍就去租單車,因為這次我哋要一嚐係長洲釣魚的滋味,有架單車會方便好多,起碼可以鍾意去邊度釣魚就踩去邊度釣。而第一個釣點是長洲屠房度釣,可惜釣咗成半粒鐘,都祇係得聰聰釣到一條魚仔,所以就轉移陣地繼續踩著單車,沿著長貴路踩去大貴灣度作釣。

原來這條長貴路的風景都唔錯,如果沒有單車我想我哋都唔會去到呢度。所以係回程時當然要影番幾張相留念下啦!

踩單車去到長貴路盡頭的大貴灣,看見這裡滿是石博位,相信這裡衰衰地點都會有啲魚釣。起初的釣況都不是太好,祇是耐唔耐才感到有魚食魚餌,好在下半段時間的釣況好好多,雖然上釣的都是「石九公」、「連咪」、「沙鑽」同「叮公」這些魚毛仔,但都總好過無,況且釣魚始終都是享受過程中帶來的樂趣。而且這裡又可以欣賞到咁靚既藍天白雲景色,真的很寫意。

釣完魚就返回長洲市中心準備買今晚燒嘢食的食物,不過就先要去醫醫個肚先,因為原來我哋只係食過早上那份早餐,況且難得來到長洲一趟,點都要食一食長洲的美食。但行來行去,揀來揀去都唔知想食咩好,又唔想食得太飽,因為今晚仲要享受燒嘢食的美食。終於我哋比呢間名叫「得得店茶餐廳 」的「魚湯」二字吸引了。

入到去坐低叫嘢食時,老闆整力推介「雲吞」同「豬潤」是最好食,但可惜雲吞已經賣晒,所以我就叫咗碗「豬潤魚湯米」,而嬋嬋就叫咗碗「牛腩魚湯米」。雖然兩碗湯米的賣相一般,但食落口又真係幾好味,尤其是老闆介紹的「豬潤」好新鮮,而且吃起來很滑口,果然不錯。個魚湯底亦都好鮮甜,係份量少啲有點唔夠喉,如果唔係陣間燒嘢食,我實會叫多碗,是值得推介比大家去一試的長洲美食。仲有呀!店中牆壁掛著的十句格言,寫得很有意思,大家記住要睇下呀!

 

食完嘢當然是馬上去街市買今晚燒嘢食的食物,除了雞翼、豬扒、牛仔骨、腸仔等等… 呢啲主要食物之外,當然就唔少得有海鮮食物啦!之後就去了大興堤路的士多店租燒烤爐燒嘢食。原來係呢啲士多租爐燒嘢食都幾好,而且價錢都唔算話太貴,租一個燒烤爐 $50、炭 $25一包、燒烤叉 $2一支,仲提供埋枱和椅,咁當然仲要幫襯埋士多買飲品啦!至於飲品價錢都是一般士多價錢,鑵裝汽水 $5一鑵,呢個價錢都可以接受啦!始終呢啲錢都是比人賺,倒不如益下士多老闆,況且又唔使自己執嘢清理場地,燒完拍拍下羅柚就走得,都幾好架!

之前真的沒想到租士多的燒烤爐燒嘢食是咁鬼史正,總括來講好滿足,而且又係食到我好鬼史飽。買的食物又啱啱好差唔多食清,淨係你睇我哋可以將條烏頭食得咁乾淨就知啦!唔知係咪開心的時間過得特別快,燒下燒下話咁快就到十一點,呢個時間當然是拿拿臨趕去碼頭坐船返香港啦!

0 comments on “釣得開心食得滿足長洲一天遊

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: