齊哇哇釣魚會

霧霧雨釣魚魚之雞魚篇

四月二十六日 (星期日) 陰,天氣報導話今天吹和緩北至東北風,風勢有時間中清勁,而氣溫介乎 19-22 度,海水溫度約為 23 度,多雲,有幾陣雨,天氣稍涼。今天我哋呢班齊哇哇釣魚會嘅高層成員,又再一次出海釣魚。

今天的天氣真的很差,比起上個月那次出海釣魚,天氣報導話冷鋒橫流襲港,加強烈季候風警告及雷暴警告的天氣更差。起碼上次海面上的風勢不大,氣溫仲暖暖地,而且亦沒有下雨。但今次當隻快艇駛到出去海洋公園對開的水域時,海面上已經看見有白頭浪的跡象,而且風勢亦比想像中大,仲開始落住霧霧細雨。可能因為落住霧霧雨的關係,溫度亦比天文台預測的還要低,不過海面環境情況尚算安全,都可以繼續釣魚。

本來今次一心想叫船家駛去天然氣管度釣,因為早前一真收到料說天然氣管附近有很多魚釣,而且大部份都是石斑、𩶘魚之類等等,總之大多數釣的都是貴價魚。但這天氣確是不適宜去天然氣管度釣,唯有問船家意見去什麼地方釣,船家就提議不如去碰下運氣釣雞魚。一聽到有雞魚釣,好呀!釣雞魚最過癮。

況且而家都係釣雞魚嘅好季節,其實雞魚在每年一到四月左右就從南中國海游向香港水域,例如擔干同果洲水域一帶就是最先有雞魚出沒的地點,繼而向其他地點水域擴散,包括南丫島、火石洲、橫洲、蒲台、螺洲等等水域出沒。

而且雞魚通常很少單獨性游動,往往都是群體出沒在海底珊瑚礁石邊緣,追捕蜉蝣生物覓食。當釣魚人士一經遇上有雞魚的地點,往往全艇釣魚人士都扯到手起手落,真係過足晒手癮。而且釣雞魚亦非常簡單,釣組亦不需要太花巧,只需鉛粒綁在最底,魚鈎在上,如果是熟手的釣魚人士,更會綁上兩至三四個魚鈎作釣,我哋簡稱為「散釣法」。魚餌用一般普通死蝦肉已經足夠,生蝦反而無咁得食。

但要留意不可放得太過墮底,大致離海底三四尺左右,配合埋手的活躍,輕輕扯動魚絲以加強吸引力。值得一提,雞魚食餌食到入扣的機會甚微,同其他魚種不同,因雞魚咀形細同咀薄,食餌的動作如泥鯭或小魚般微啄輕啜。當感覺到有(妹妹下)的跡象,就可以揪絲。而且雞魚食餌的動作都不像一般魚有扯絲或往後拉的感覺,如發覺有大力扯絲,咁就恭喜你,這條肯定有過斤重的大雞魚或其他大魚,因為很多時候係雞魚群中,往往混雜有其他魚爭餌覓食,例如細鱗、沙𩶘或者牙點等等之魚類。

最重要一提是,當釣到雞魚時,不應用過度的力去收絲,因為雞魚個咀很薄,好易因為大力扯絲,而扯(爆咀)造成(走雞)的情況出現。

說回今日的戰況,第一個釣點是南丫島黃竹角,一來到已經看見有幾艘船隻,係度釣緊雞魚,看見別人一放絲三兩分鐘就起條雞魚上來,真係睇到眼都紅埋。但不知何故?我釣來釣去都只係釣到石九公,之後想到,係喎!雞魚好像對生蝦無咁得食,最後船家教我哋將隻生蝦頭殼剝掉,咁會得食好多。這招果然使得,我終於都有第一條雞魚上釣喇,而聰聰更加厲害,比佢釣到條斑馬蝶,因為呢啲斑馬蝶都是好難釣到的魚嚟架!

不過釣了不夠半個鐘左右,由於流水轉了關係,啲雞魚已經唔肯開口食餌,所以係度只係釣到數條雞魚同一些石九公之類。之後船家就提議駛去上次北角村對開水域再碰下運氣。去到呢到果然又仲有雞魚釣,而且仲幾密口添,細佬亦係呢到發揮佢嘅凌厲後勁,釣上十多條以上的雞魚。當然我同聰聰更係唔會輸洩比佢,同樣都釣到好多條雞魚。

除了有雞魚釣之外,耐不耐又有一啲石斑仔上釣,個個都笑住口解魚。只可惜今天的水流實在太勁喇,用正常的釣組、鉛粒,根本就唔可以沉到落海底。我哋幾個攪到要將個釣組,綁上三至四粒鉛,先可以有機會沉到落海底。亦因為咁,而導致今天收獲大打折扣,到最後亦因為水流太急無法繼續釣下去,唯有駛去數碼港附近繼續釣。

去數碼港雖然風平浪靜,而且亦開始沒有下雨,但就沒有之前咁多魚上釣,有的只是一些雜魚仔。但我就一於好少理,既然來到數碼港,一於博一博佢,勾隻大隻啲嘅生蝦,博下有冇大魚上釣。因為我知數碼港呢一帶常常都有大魚出沒,而且多數是細鱗、紅鮪、大𩶘魚之類。

正當大家釣到開始沒精打彩時,竟然比我釣到條成斤重的大沙𩶘,想不到今日又比我釣返條大魚,真係開心到我由心裡面笑出來的笑容。只可惜係度獨係釣得一條大沙𩶘,之後就再沒有釣到其他魚,而且時間已經是下午四點幾。見仲有時間,最後駛回上次釣䱛魚的地點試下仲有冇䱛魚釣。哈哈!果然仲有得釣喎!但就沒有上次咁多囉,不過亦有一兩條大嘅釣到,已經都算不錯。

總括來講今日嘅成績已經算幾好,起碼都有番咁上下收穫。雖然今日嘅天氣的確比上個月釣果次差好多,而且風又大,仲成日落住霧霧雨粉,攪到個個人個身都濕濕地。不過以一個喜歡釣魚的人來講,只要能夠享受到釣魚時帶來的快樂,就算幾凍幾辛苦咩都唔會計較。

0 comments on “霧霧雨釣魚魚之雞魚篇

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: