瘋強為食 強說強話

今晚橕檯腳

難得今天星期六可以正常收六點唔使開OT,當然要約老婆出街拍拖、行街街、橕檯腳啦!

今晚同嬋嬋去咗旺角行街街,順便去幫部數碼相機買番塊電池,因為發覺部 Canon 960 跟機塊原裝電,唔知點解脹脹地,而且有時影相時感覺到部相機有少少發熱,為了安全起見,都是買番塊新電池穩陣啲。不過有樣嘢真的要講比大家知,原來同一條街,相差幾個舖位啲價錢會相差咁遠。竟然同一牌子同一型號的電池相差成三十蚊咁多,所以有時買嘢真係要嘥啲腳骨力行多幾間舖格價,千祈唔好蝕低比啲奸商呀!

行完街街,買完嘢當然是搵嘢食啦!今晚去咗旺角通菜街地下嘅金太郎食嘢,呢間日本迴轉壽司店好耐之前食過一次。印象中覺得幾抵食,因為呢間金太郎賣點都是價錢大眾化,十蚊有三件三文魚壽司,而且比起幾間一般大型迴轉壽司連鎖店還大件,雖然三文魚未算肥美,不過味道都感覺是新鮮,真係好抵食,我就食咗兩碟。

今晚試食咗一碗名為"街頭拉麵",碗拉麵幾好味同算是幾大碗,湯底有很香豬骨味,我同嬋嬋一人一半分嚟食。仲叫咗一份"鹽燒三文魚頭",燒得算是幾香,肉也算多。但覺得油咗少少,唔夠乾身。其餘仲有芝士蝦壽司、北寄貝壽司、芝麻炸軟殼蟹卷、芥辣八爪魚軍艦、鮑魚仔軍艦,同埋嬋嬋每次去食壽司必食最喜愛的海膽軍艦。埋單計數二百蚊找番十幾蚊,總結來說,以呢個價錢來講都算不差,可以再有幫襯機會。

話時話,原來我足足有成個幾月,都冇陪過嬋嬋去行街街啦,甚至乎兩口子一齊橕檯腳食飯的時間都沒有,記得對上一次已經是八月頭那次。無法啦!自從轉咗呢間新公司工作之後,工作量一直都很多,除了係新入職果個幾星期正常收工之外,基本上差不多而家每日都要加班,就連上次八號風球同十月一日國慶假期都要返工,如果唔係,我又點會創下一個月有八十幾個鐘OT咁多。

不過,雖然這份工作是很忙,但我仍感到忙碌中的工作帶給我很大的滿足感同快樂,因為我真的很喜歡這份工作。其實作為一個打工仔,只要找到一份適合自己的工作,就會忘記工作忙碌中帶來苦。咁當然,有時我們會對工作上遇到的一些少麻煩,而有所抱怨,畢竟我們都是有感情的人,人總會有七情六欲。但只要明確、清楚自己的能力和專長,瞭解自己的興趣和潛能,找一份安定的工作應該不太難。因為每一種行業都需要我們,只是所需要的人才各有不同。

打個比喻,就好像一個小孩子怎能穿得上大人的皮鞋呢?因此鞋店中有各式各樣大細的皮鞋,以適合各種人的需要。就是這個道理,我們總要花點時間去揀選適合自己的工作,當找到就要好好珍惜,因為一份適合自己,而又安定、喜歡的工作,一生之中是沒有幾多個機會可以遇上,各位打工仔加油呀!

0 comments on “今晚橕檯腳

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: